உலகநாயகன் கமலஹாசன் நடித்த ‘விக்ரம்’ திரைப்படம் இன்று உலகம் முழுவதும் திரையரங்குகளில் வெளியாகி பாசிட்டிவ் விமர்சனங்களைப் பெற்று வருகிறது. இந்த படத்தை பார்த்தவர்கள் கமல்ஹாசன், பகத் பாசில், விஜய் சேதுபதி ஆகியோரின் நடிப்பு மற்றும் லோகேஷ் கனகராஜ் திரைக்கதை, அனிருத்தின் இசையை பாராட்டி புகழ்ந்து வருகின்றனர். இந்தப் படம் ஒரு சூப்பர் ஹிட் படம் என்பது இப்போது உறுதியாகி விட்டது
இந்த நிலையில் ‘விக்ரம்’ படத்தை பார்க்கும் முன் ரசிகர்கள் ‘கைதி’ படத்தை பாருங்கள் என்று இயக்குனர் லோகேஷ் கனகராஜ் வேண்டுகோள் விடுத்துள்ளார். இதுகுறித்து அவர் வெளியிட்டுள்ள அறிக்கையில் கூறியிருப்பதாவது:
வணக்கம் நண்பர்களே! இதுவரை பட வெளியீட்டிற்கு முன் நான் இவ்வளவு உணர்ச்சிவசப்படுவதில்லை. நினைவு தெரிந்த நாள் முதல் என் சின்ன வயதில் இருந்தே உலகநாயகன் ரசிகனாகவே இருந்திருக்கிறேன். இன்றைக்கு அவரது படத்தை இயக்கி இருக்கிறேன். இன்று ஒரு கனவைப் போல் இருக்கின்றது.
இதனை வெற்றிகரமாக நிறைவேற்ற எனக்கு துணை நின்ற நல் உள்ளங்கள் அனைவருக்கும் என் நன்றியை தெரிவித்துக்கொள்கிறேன். விக்ரம் பட வேலைகளைத் தொடங்கி 18 மாதங்கள் ஆகின்றன. ரத்தமும் வியர்வையும் சிந்தி ரசிகர்களான உங்களை மகிழ்விக்க ஒரு மனிதரை, ஒரு நாட்டின் பெருமிதத்தை, உலக நாயகன் கமல்ஹாசனை கொண்டாட உழைத்திருக்கின்றோம்.
வாய்ப்புக்கு நன்றி சார்! இந்த திரைப்படம் உங்கள் ரசிகன் என்னிடமிருந்து உங்களுக்கு பரிசாக வருகிறது. இதனை நான் என்றென்றும் மகிழ்வுடன் நினைவில் சேமித்து வைப்பேன்.
என் அன்பான ரசிகர்களுக்கு, இன்னும் சில மணிநேரங்களில் ‘விக்ரம்’ திரைப்படம் முழுக்க உங்கள் சொந்தமாகிவிடும். அது உங்களை மகிழ்வித்து மறக்க முடியாத மகத்தான திரையரங்கு அனுபவத்தை கொடுக்கும். இன்னொரு முறை கைதி படத்தை பார்த்துவிட்டு ‘விக்ரம்’ அழைத்துச் செல்லும் உலகுக்கு வாருங்கள்’ என்று வேண்டிக் கொள்கிறேன். இவ்வாறு லோகேஷ் கனகராஜ் தெரிவித்துள்ளார்.
#விக்ரம் ??@ikamalhaasan pic.twitter.com/vMKR4HnImF
— லோகேஷ் கனகராஜ் (@Dir_Lokesh) ஜூன் 2, 2022
